دیجیتاڵ
هەڵبژاردەی نەرویج بەسەرکردایەتیی ئێرلینگ هالاند ئامادەیە و دەیەوێت سوود لە یاریگا و هاندەرانی وەربگرێت بۆ ئەەی بردنەوەیەکی دیکە تۆماربکات و پێشەنگی ریزبەندی کۆمەڵەی چوارەمی نەیشنسلیگ لە پۆرتوگال وەربگرێت.
لە یاریی یەکەمدا، مەکینەی گۆڵ کردن، ئێرلینگ هالاند دوو گۆڵی بۆ هەڵبژاردەکەی تۆمارکرد، بە ورەیەکی بەرزەوە بۆ یاریی لووتکەی نەیشنسلیگ بەرامبەر پۆرتوگال ئامادەیە و دەیەوێت بە گۆڵەکانی سەرکردایەتیی بردنەوەیەکی دیکەی تیپەکەی بکات بۆ بەرزکردنەوەی خاڵەکانیان و چوونە پێشەنگی ریزبەندی کۆمەڵەکە.
پێکهاتەی نەرویج لەگەڵ مۆندیالی رابردوو گۆڕانکارییەکی وای بەخۆیەوە نەبینیووە، تیپەکە پڕە لە ئەستێرەی لاو و لەژێر سەرپەرشتی ساڵت سۆلباکن دەیەوێت لە نەیشنسلیگدا دوور بڕوات.
یاریی ئەمشەوی نێوان نەرویج و پۆرتوگال، کە کاژێر 21:45 دەبێتە یەکەم رووبەڕووبوونەوەی ئێرلینگ هالاند و کریستیانۆ رۆناڵدۆ بەدرێسی هەڵبژاردەکانیان رووبەڕووی یەک ببنەوە.
دوای بردنەوەی یەکەم یارییان لە نەیشنسلیگدا بەرامبەر وێڵز، پۆرتوگال لە دەرەوەی یاریگای خۆی یارییەکی دیکە ئەنجامدەدات و کریستیانۆ رۆناڵدۆ دەبێتە میوانی ئێرلینگ هالاند.
کریستیانۆ رۆناڵدۆ و هەڵبژاردەی پۆرتوگال، رۆژی هەینی گەیشتنە ئۆسلۆ و رۆژی شەممە دوایین ئامادەکارییەکانیان بۆ یارییەکە ئەنجامدا، ئەمشەو تۆپی پێ رکابەرییەکی سەرنجڕاکێشی دوو گۆڵکاری دیاری جیهان بەخۆیەوە دەبینێت.
سەرەڕای ئەوەی لە یاریی رابردوودا بەشێوەی سەرەکی یارییکرد و 67 خولەک یارییکرد، هێشتا دیارنییە کریستیانۆ رۆناڵدۆ بەشێوەی سەرەکی بەشداری لە یارییەکەی ئەمشەودا دەکات یان نا.
راهێنەری پۆرتوگال دووپاتیکردووەتەوە، لە یارییەکانی نەیشنسلیگدا سوود لە هەموو ئەو یاریزانانە وەردەگرێت کە بانگهێشتکراون و تیپەکەی بۆ یارییەکە ئامادەیە.
پۆرتوگال 11 یاریی بەرامبەر هەڵبژاردەی نەرویج کردووە تەنیا یەک یاریی دۆڕاندووە، 8 سەرکەوتنی بەدەستهێناوە و دوو جار هەردوولا یەکسانبوون.
رۆناڵدۆ هیچ گۆڵێکی بەرامبەر نەرویج نەکردووە و دەیەوێت ئەمشەو سەرکردایەتیی تیپەکەی بکات بۆ بەدەستهێنانی سێ خاڵی دیکە.
