وەزیرانی دەرەوەی گرووپی حەوت داوایان لە ئێران کرد دەستبەرداری چەکدارکردن و پشتیوانیکردنی حووسییەکان لە یەمەن ببێت. وەزیران جەختیانکردەوە، بەردەوامبوونی ئەم پشتیوانییە پەرەسەندنێکی مەترسیدارە و هەڕەشەی قوڵکردنەوەی ململانێکان، لاوازکردنی بازرگانیی نێودەوڵەتی و تێکدانی سەقامگیریی ئابووریی جیهانی لێدەکەوێتەوە.
ئەمڕۆ سێشەممە، 22ـی ئەیلوولی 2026، وەزیرانی دەرەوەی بەریتانیا، کەنەدا، فەرەنسا، ئەڵمانیا، ئیتاڵیا، ژاپۆن و ئەمریکا لە بەیاننامەیەکدا کە دوای کۆبوونەوەیەکیان لە پەراوێزی کۆبوونەوەکانی کۆمەڵەی گشتیی نەتەوە یەکگرتووەکان بڵاوکرایەوە، رایانگەیاند، رەفتارەکانی ئێران پێشێلکردنی بڕیارەکانی ئەنجوومەنی ئاسایشی نێودەوڵەتییە و دەبێتە هۆی ئاڵۆزتربوونی زیاتری دۆخەکە.
وەزیرانی دەرەوەی گرووپی حەوت هێرشەکانی حووسییەکانیان دژی سعوودیە سەرکۆنەکرد و روونیکردەوە، دۆخی یەمەن هەڕەشەیەکی مەترسیدارە بۆ سەر سەقامگیری و ئاسایشی ناوچەکە و ئاسایشی وزەی جیهانی.
هاوکات داوایان لە حووسییەکان کرد دەستبەجێ کۆتایی بە هەموو چالاکییە سەربازییەکان و هێرشکردنە سەر کەشتییە مەدەنییەکان بهێنن، هەروەها داوایان لێکردن بە نیازپاکییەوە بگەڕێنەوە بۆ پرۆسەی سیاسی.
ئەم بەیاننامەیەی گرووپی حەوت لەگەڵ پەرەسەندنی هۆشدارییە نێودەوڵەتییەکان سەبارەت بە لێکەوتەکانی هێرشی حووسییەکان بۆ سەر کەشتیوانی لە ناوچەکە یەکیگرتووەتەوە، کە بووەتە هۆی تێکچوونی جووڵەی بازرگانی و ئاسایشی وزە. هێرشەکانی حووسییەکان بۆ سەر کەشتیوانیی نێودەوڵەتی رووبەڕووی سەرکۆنەی نەتەوە یەکگرتووەکان و چەندین وڵات بووەتەوە، کە داوای راگرتنی هێرشەکان و گەڕانەوە بۆ رێڕەوی سیاسی دەکەن.
لە سەرەتای سێپتەمبەرەوە دەیان هەزار کەس ئاوارە بوون، لە کاتێکدا زیاتر لە 2 هەزار یەمەنی پەڕیونەتەوە بۆ جیبووتی. ئەم دۆخە لە کاتێکدایە قەیرانی سووتەمەنی رێگری لەوە دەکات هاووڵاتییانی زیاتر ناوچەکانی شەڕ بەجێبهێڵن.
