عەبدوڵڵا حاجی مەحموود، وەزیری کاروباری شەهیدان و ئەنفالکراوانی حکوومەتی هەرێمی کوردستان و عەبدولئیلا وائیلی، سەرۆکی دەزگای شەهیدانی عێراق یاداشتێکییان واژۆ کرد و بە گوێرەی یاداشتەکە، لەمەودوا مووچەی کەسوکاری شەهیدانی هەرێمی کوردستان هاوتای عێراق دەکرێت.
وەزیری کاروباری شەهیدان و ئەنفالکراوانی حکوومەتی هەرێمی کوردستان رایگەیاند، ئەو لێکتێگەیشتنەی ئەمڕۆ لەگەڵ دەزگای شەهیدانی عێراق واژۆ کرا دەبێتە سەرەتایەکی گرنگ بۆ پشتیوانی لە ماف و شایستەکانی کەسوکاری شەهیدان.
عەبدولئیلا وائیلی، سەرۆکی دەزگای شەهیدانی عێراق رایگەیاند، ئامانج لە رێککەوتنەکە کارکردنی هاوبەش و ئاسانکارییە بۆ رایی کردنی مامەڵەی کەسوکاری شەهیدان، هەروەها ئاشکراکردنی گۆڕە بەکۆمەڵەکان و دروستکردنی سیستمێکی ئەلکترۆنیی هاوبەش، لەگەڵ هەوڵدانی بەردەوام بۆ ناساندنی تاوانەکانی ئەنفال و کیمیابارانی هەڵەبجە لەسەر ئاستی نێودەوڵەتی.
