ئەمڕۆ پێنجشەممە، 24ـی ئەیلوولی 2026، حکوومەتی پاکستان رایگەیاند؛ بە فڕۆکەی جەنگی و درۆن 10 پێگەی لە خاکی ئەفغانستان بۆردومان کردووە. ئەم هەنگاوە لە وەڵامی زنجیرەیەک هێرشی خوێناوی دێت کە چەند رۆژێک پێش ئێستا ناوچە سنوورییەکانی تێوەگلا و ژمارەیەک کوژراو و برینداری لێکەوتەوە.
عەتەڵڵا تارار، وەزیری راگەیاندنی پاکستان لە پلاتفۆڕمی ئێکس رایگەیاند، سوپای وڵاتەکە بە فڕۆکەی جەنگی و درۆن هێرشی وردی کردووەتە سەر 10 پێگە لە ئەفغانستان. تارار روونیکردەوە، هێرشەکان بە ئەنقەست و بە شێوەیەکی دیاریکراو بوون و ئامانجە سەربازییەکان بە وردی دەستنیشان کرابوون، چونکە هێرشەکان راستەوخۆ پەیوەندییان بەو هەوڵە توندوتیژییانەوە هەبووە کە دەکرێنە سەر خاکی پاکستان.
پێشتر بەرپرسێکی پۆلیسی پاکستان بە ئاژانسی فرانس پرێسی راگەیاند، لە ئاکامی ئەو هێرشەدا کە پاشنیوەڕۆی هەینی، 19ـی ئەیلوولی 2026، کرایە سەر بارەگای سەرەکیی پۆلیسی کۆهات لە هەرێمی خەیبەر پختونخوا، 31 کەس گیانیان لە دەستدا و زیاتر لە 100 کەسی دیکەش بریندار بوون و پێکدادانەکان بۆ ماوەیەک بەردەوام بوون. سەرچاوەیەکی ئاگادار کە نەیویستووە ناوی ئاشکرا بکرێت، ئاماژەی بەوە دا ژمارەیەک هێرشبەر خۆیان لەناو لقی تایبەتی پۆلیسدا حەشار دابوو و ماوەیەک ئاڵوگۆڕی تەقەکردن لەنێوان چەکدارەکان و هێزە ئەمنییەکاندا روویدا. تا ئێستا هیچ لایەنێک بەرپرسیارێتیی ئەو هێرشەی نەگرتووەتە ئەستۆ، بەڵام گومان لەسەر بزووتنەوەی تاڵیبانی پاکستان هەیە.
عاسف عەلی زەرداری، سەرۆکی پاکستان، نیگەرانیی قووڵی خۆی بۆ گیانلەدەستدانی قوربانیان دەربڕی و جەختیکردەوە، بنەبڕکردنی یەکجاریی تیرۆریستان و ئەو لایەنانەی لە دەرەوە پشتیوانییان لێ دەکرێت، بۆ ئاسایشی نیشتمانیی پاکستان گرنگیی یەکلاکەرەوەی هەیە.
پاکستان ماوەیەکی زۆرە حکوومەتی تاڵیبان لە ئەفغانستان تۆمەتبار دەکات بەوەی پەناگە بەو گرووپە توندڕەوانە دەدات کە لە هەرێمەکانی خەیبەر پختونخوا و بەلوچستان هێرش دەکەن، هەرچەندە حکوومەتی کابوڵ هەمیشە ئەو تۆمەتانە رەت دەکاتەوە.
ئەم لێکتێنەگەیشتن و تۆمەتبارکردنانە گرژیی توند و پێکدادانی چەکداریی لەنێوان هەردوو دراوسێدا دروست کردووە. پێشتریش پاکستان بەهۆی هەمان دۆسییەوە چەند هێرشێکی ئاسمانی کردبووە سەر خاکی ئەفغانستان، کە لە ئاکامدا و بەگوێرەی راگەیەندراوی کابوڵ و نەتەوە یەکگرتووەکان، لە هێرشەکانی مانگی حوزەیراندا دەیان هاووڵاتیی مەدەنی بوونە قوربانی.
