ئەنجوومەنی وەزیرانی هەرێمی کوردستان، داوا دەکات لە بودجەی 2027 مووچە و شایستە دارایییەکان و پێداویستییەکانی وەزارەتی پێشمەرگە لە چوارچێوەی خەرجییە سیادییەکان، هاوشێوەی وەزارەتی بەرگریی فیدراڵ جێگیر بکرێت.
ئەمڕۆ چوارشەممە 23ـی ئەیلوولی 2026، بە سەرۆکایەتی مەسرور بارزانی، سەرۆکی ئەنجوومەنی وەزیران و ئامادەبوونی قوباد تاڵەبانی، جێگری سەرۆکی ئەنجوومەنی وەزیرانی هەرێمی کوردستان، ئەنجوومەنەکە کۆبووەوە و ژمارەیەک بابەتی گرنگی پەیوەست بە یەکخستنەوەی هێزەکانی پێشمەرگە، داشکاندنی قەرزە کۆنەکانی کارەبا و رێکخستنی چالاکییە ئابووری و بازرگانییەکانی تاوتوێ کرد.
بڕگەی یەکەمی کۆبوونەوەکە؛ پرۆسەی رێکخستن و یەکخستنەوەی هێزەکانی پێشمەرگە
بە پێی راگەیەنراوی حکوومەتی هەرێمی کوردستان، لە بڕگەی یەکەمی کۆبوونەوەدا، وەزیری کاروباری پێشمەرگە، راپۆرتێکی وردی سەبارەت بە پرۆسەی رێکخستن و یەکخستنەوەی هێزەکانی پێشمەرگە لە ژێر چەتری وەزارەتی کاروباری پێشمەرگە خستە روو و هەنگاوە ئەنجامدراوەکان و پلان و پێداویستییەکانی قۆناخی داهاتووی پرۆسەکەی روون کردەوە
لە راپۆرتەکەدا، هەروەها باس لە هەوڵەکانی حکوومەتی هەرێمی کوردستان کرا بۆ یەکسانکردنی مووچە، پلە، دەرماڵە و شایستە دارایییەکانی پێشمەرگە لەگەڵ هاوتاکانیان لە دامەزراوەکانی بەرگریی حکوومەتی فیدراڵ و جێگیرکردنی پێداویستییە دارایییەکانی وەزارەتی پێشمەرگە لە چوارچێوەی خەرجییە سیادییەکانی بودجەی فیدراڵی؛ بەو پێیەی هێزی پێشمەرگە بەشێکە لە سیستەمی بەرگریی عێراق.
سکرتێری ئەنجوومەنی وەزیرانیش ئاماژەی بەوە دا کە هەرێمی کوردستان لە رێگەی پشکی خۆی لە بودجەی فیدراڵییەوە بەشداری لە دابینکردنی خەرجییە سیادییەکان، لەوانە خەرجییەکانی وەزارەتی بەرگریی فیدراڵ دەکات؛ بۆیە پێویستە مووچە، دەرماڵە و شایستە دارایییەکانی پێشمەرگە، لەگەڵ خەرجییەکانی بەکاربردن، راهێنان، پڕچەککردن و پڕۆژەکانی وەزارەتی پێشمەرگە، بە پێوەری یەکسان لە چوارچێوەی خەرجییە سیادییەکانی بودجەی فیدراڵیدا جێگیر بکرێن
لە راگەیەنراوەکەدا هاتووە، پرۆسەی یەکخستنەوەی هێزەکانی پێشمەرگە، هەنگاوی گرنگی بڕیوە؛ سەرجەم پێشمەرگەکان تۆماری بایۆمەترییان بۆ کراوە، پرۆسەی بەبانکیکردنی مووچەکانیان ئەنجامدراوە و لیستی ناو و زانیارییەکانیان لە لایەن دامەزراوە پەیوەندیدارەکانی حکوومەتی فیدراڵ وردبینی کراوە.
مەسرور بارزانی جەختی لە گرنگی پاراستنی ماف و شایستە داراییەکانی پێشمەرگە کردەوە
لە بەشێکی دیکەی کۆبوونەوەکەدا مەسرور بارزانی، سەرۆکی ئەنجوومەنی وەزیران، یەکخستنەوەی هێزەکانی پێشمەرگەی بە دەستکەوتێکی مێژوویی و نیشتمانی بۆ هەرێمی کوردستان دانا.
هاوکات جەختی لەوە کردەوە، کە یەکخستنەوە تەنیا رێکخستنەوەی یەکە سەربازییەکان نییە، بەڵکوو پرۆسەیەکی دامەزراوەییە بۆ رێکخستنی هەموو هێزەکانی پێشمەرگە لە ژێر چەتری وەزارەتی پێشمەرگە و یەک فەرماندەیی و بڕیاری دامەزراوەیی بە جۆرێک پێشمەرگە ببێتە سوپایەکی نیشتمانی کە ئامانجی سەرەکی بەرگریکردن بێت لە خاک و خەڵکی کوردستان.
هەروەها سەرۆکوەزیران جەختیشی لە گرنگی پاراستنی ماف و شایستە داراییەکانی پێشمەرگە و یەکسانکردنی بە هاوتاکانیان لە سوپای عێراق کردەوە.
لای خۆیەوە جێگری سەرۆکی ئەنجوومەنی وەزیران، پیرۆزبایی لە سەرکەوتنی پرۆسەی یەکخستنەوەی هێزەکانی پێشمەرگە کرد و بە دەسکەوتێکی نیشتمانی و دامەزراوەیی ناوی برد و جەختی لە بەردەوامیی پرۆسەی چاکسازی و پیشەییکردنی وەزارەتی پێشمەرگە و پاراستنی دەسکەوتەکانی کردەوە.
هاوکات پێداگریی لەسەر یەکسانکردنی مووچە و شایستە دارایییەکانی پێشمەرگە لەگەڵ هاوتاکانیان لە دامەزراوەکانی بەرگریی حکوومەتی فیدراڵ کرد.
دوای گفتوگۆ و راگۆڕینەوە، ئەنجوومەنی وەزیران پیرۆزبایی لە گەلی کوردستان کرد بۆ ئەم هەنگاوە مێژووییە و سوپاسی هەموو ئەو لایەنانەی کرد کە رۆڵیان لە سەرخستنی پرۆسەکە هەبووە، بە تایبەتی ئەمەریکا، هێزەکانی هاوپەیمانان و هاوبەشانی پرۆسەی رێکخستن، چاکسازی و یەکخستنەوەی هێزەکانی پێشمەرگە.
هەروەها ئەنجوومەنەکە داوای لە هەموو لایەنە سیاسییەکان کرد بە گیانی بەرپرسیارییەتی نیشتمانی، پشتیوانیی ئەم پرۆسەیە بکەن
لە راگەیەنراوەکەدا ئەوەش هاتووە، ئەنجوومەنی وەزیران، شاندی باڵای دانوستانکاریی حکوومەتی هەرێمی کوردستانی راسپارد کە لە دانوستانەکانی بودجەی ساڵی 2027ـدا بەردەوام بێت لە هەوڵەکان بۆ جێگیرکردنی مووچە، دەرماڵە، شایستە دارایییەکان و پێداویستییەکانی وەزارەتی پێشمەرگە لە چوارچێوەی خەرجییە سیادییەکان، هاوشێوەی وەزارەتی بەرگریی فیدراڵ. هەروەها گرنگیی رۆڵی نوێنەر و فراکسیۆنە کوردستانییەکان لە بەغدا بۆ داکۆکیکردن لەم داواکارییە لە پرۆسەی ئامادەکردن و پەسەندکردنی بودجەی 2027 دووپات کرایەوە.
بڕگەی دووەمی کۆبوونەوەکە؛ داشکاندنی قەرزە کەڵەکەبووەکانی کارەبا درێژ کرایەوە
لە بڕگەی دووەمی کۆبوونەوەدا، دەرئەنجامەکانی جێبەجێکردنی بڕیاری ئەنجوومەنی وەزیران ژمارە (299) لە 2026/7/22، سەبارەت بە داشکاندنی قەرزە کۆنە کەڵەکەبووەکانی هاوبەشانی تۆڕی کارەبای نیشتمانی و پێشنیازی درێژکردنەوەی ماوەی سوودمەندبوون لە بڕیارەکە تاوتوێ کرا.
وەزیری کارەبا راپۆرتێکی وردی لەم بارەیەوە خستە روو و ئاستی وەڵامدانەوەی هاووڵاتییان، بڕی قەرزی یەکلاییکراوە و کاریگەریی بڕیارەکە لەسەر رێکخستنەوەی دۆسیەی قەرزە کەڵەکەبووەکان و دابینکردنی بەشێک لە خەرجییەکانی کەرتی کارەبای روون کردەوە.
ئەنجوومەنی وەزیران جەختی لەوە کردەوە کە ئامانجی بڕیارەکە، لە لایەکەوە سووککردنی بارگرانیی دارایی لەسەر هاووڵاتییان و هاندانیانە بۆ یەکلاییکردنەوەی قەرزە کۆنەکانە و لە لایەکی دیکەشەوە، زیادکردنی توانای داراییی وەزارەتی کارەبایە بۆ دابینکردنی پێداویستییەکانی بەرهەمهێنان، لەوانە کڕینی گازی سروشتی و بەردەوامیدان بە خزمەتگوزاریی کارەبا
دوای گفتوگۆ، ئەنجوومەنی وەزیران بە کۆی دەنگ بڕیاری دا ماوەی سوودمەندبوون لە داشکاندنی قەرزە کۆنە کەڵەکەبووەکانی کارەبا لە 2026/9/24 تا 2026/10/18 بە هەمان مەرج و بڕگەکانی بڕیاری پێشوو درێژ بکرێتەوە؛ بۆ ئەوەی دەرفەتی زیاتر بۆ هاووڵاتیان بڕەخسێت لە داشکاندنەکە سوودمەند بن و قەرزەکانیان یەکلایی بکەنەوە و داهاتی بەدەستهاتووش جارێکی دیکە بۆ دابینکردن و باشترکردنی خزمەتگوزاریی کارەبا خەرج بکرێتەوە.
بڕگەی سێیەمی کۆبوونەوەکە؛ بڕیاری جێبەجێکردنی یاسای کۆمپانیا گشتییەکان ژمارە (22)ی ساڵی 1997 لە هەرێمی کوردستان درا
لە بڕگەی سێیەم و کۆتایی کۆبوونەوەدا، پێشنیاری دەستپێکردنی ئامادەکارییە یاسایی و کارگێڕییەکان بۆ جێبەجێکردنی یاسای فیدراڵیی کۆمپانیا گشتییەکان لە هەرێمی کوردستان خرایە روو؛ بە مەبەستی نزیککردنەوە و هەماهەنگکردنی چوارچێوە یاسایی و رێکارییەکانی چالاکییە ئابووری و بازرگانییەکان لە نێوان هەرێمی کوردستان و حکوومەتی فیدراڵ.
لە پێشکەشکردنی بابەتەکەدا، کە بەڕێوەبەری گشتیی فەرمانگەی تۆماری کۆمپانیاکانیش بۆ ئەم مەبەستە میوانداری کرا بوو، وەزیری بازرگانی و پیشەسازی گرنگیی کۆمپانیا گشتییەکانی وەک ئامرازێکی گرنگی حکوومەت بۆ بەڕێوەبردنی چالاکییە ئابووری، بازرگانی، پیشەسازی و خزمەتگوزارییەکان روون کردەوە.
هەروەها وەزیری بازرگانی باسی لە چۆنیەتی سوودوەرگرتن لە ئەزموونی حکوومەتی فیدراڵ لەم بوارەدا کرد، بە شێوەیەک کە دامەزراوە گشتییەکان بتوانن بە کارایی و خێرایی زیاتر چالاکی بکەن و لە هەمان کاتدا پابەند بن بە بنەماکانی چاودێری، شەفافییەت و پاراستنی سامانی گشتی
دواتر بەڕێوەبەری گشتی فەرمانگەی تۆماری کۆمپانیاکان، جەختی لە گرنگیی هەماهەنگیکردنی یاسا و رێنماییە پەیوەندیدارەکان لە بوارەکانی کۆمپانیا، بازرگانی، وەبەرهێنان و چالاکییە ئابوورییەکان کردەوە؛ بە مەبەستی کەمکردنەوەی جیاوازییە یاسایی و رێکارییەکان، ئاسانکاریکردن بۆ کۆمپانیا و بازرگانانی هەرێم بۆ چالاکیکردن لە سەرانسەری عێراق و دروستکردنی ژینگەیەکی یاسایی روونتر و گونجاوتر بۆ کەرتی گشتی و تایبەت
لە کۆتاییدا، ئەنجوومەنی وەزیران، بە رەچاوکردنی تایبەتمەندی و دەسەڵاتە دەستوورییەکانی هەرێمی کوردستان، بڕیاری جێبەجێکردنی یاسای کۆمپانیا گشتییەکان ژمارە (22)ـی ساڵی 1997ـی هەموارکراو لە هەرێمی کوردستان دا، هاوشانی یاسای کۆمپانیاکان ژمارە (21)ـی ساڵی 1997ـی هەموارکراو، وەک دوو یاسای تەواوکاری یەکتر؛ بە مەبەستی کاراکردنی دامەزراوە گشتییەکان، پەرەپێدانی ژینگەی بازرگانی و ئابووریی هەرێمی کوردستان و هەماهەنگکردنی چوارچێوە یاساییەکان لەگەڵ یاسا فیدراڵییە پەیوەندیدارەکان.
