بورهان خۆشناو، هونەرمەندی ناسراوی کورد، نوێترین گۆرانی خۆی بەناوی "مەستوورە"، بەشێوەی ڤیدیۆ کلیپ بڵاوکردەوە.
سێشەممە، 22ی ئەیلوولی 2026، بورهان خۆشناو، هونەرمەندی ناسراوی کورد بەی راگەیاند، "گۆرانی "مەستوورە"، ئاواز و هۆنراوەکەی فۆلکلۆرە و هێمن حوسێن کاری ئامادەکردن و دابەشکردنی موزیکەکەی بۆ کردووە، لەلایەن ئاکۆ عومەر کاری ئەندازەی دەنگی بۆ کراوە، لە دەڤەری باڵەکایەتی لە گوندی سەکران ڤیدیۆکلیپی بەرهەمەکە تۆمارکراوە."
ئەو هونەرمەندە سەبارەت بە تۆمارکردنی گۆرانییەکە گوتی، "لە ڤیدیۆکلیپەکەدا، سروشتی دەڤەری باڵەکایەتی و بە تایبەتی گوندی سەکران، بەشێک لە چیرۆکی بەرهەمەکە پێکدەهێنێت؛ دیمەنە سروشتییەکان لەگەڵ دەنگ و مۆسیقای گۆرانییەکە هاوتەریب کراون، بۆ ئەوەی بەرهەمەکە تەنیا گۆرانییەک نەبێت، بەڵکو وێنەیەکی فەرهەنگی و سروشتی لە ژینگە و ناسنامەی کوردی بێت."
بورهان خۆشناو جەختی لەوەش کردەوە، "ئەو گۆرانییەم بە پشتبەستن بە میراتی فۆلکلۆری و بەکارهێنانی توانای هونەریی نوێ، هەوڵم داوە دەنگ و رەنگی گۆرانیی کوردی لەگەڵ جوانیی سروشتی کوردستان پێکەوە بخەمەڕوو و بە شێوازێکی سەردەمیانە بیگەیەنمە بینەر و گوێگرەکانم."
بورهان خۆشناو، هونەرمەندی ناسراوی کورد، خەڵکی شاری هەولێرە. لە ساڵی 1978 دەستی بە کاری هونەری کردووە و جگە لە گۆرانییەکانی، لاوک و حەیران و مەقامیش دەڵێت و تا ئێستا زیاتر لە 100 بەرهەمی بڵاوکردووەتەوە.
