ئەمڕۆ پێنجشەممە، 17ـی ئەیلوولی 2026، لە راگەیەندراوێکدا وەزارەتی کارەبا رایگەیاند؛ پرۆسەی گواستنەوەی گاز لە کێڵگەی کۆرمۆر بۆ وێستگەکانی بەرهەمهێنانی کارەبا بەرەو ئاساییبوونەوە چوو. ئەم هەنگاوە بە هەوڵی هەردوو وەزارەتی کارەبا و وەزارەتی سامانە سروشتییەکان و بە هەماهەنگی لەگەڵ کۆمپانیای دانەگاز هاتووەتە دی.
وەزارەتی کارەبا روونیشی کردەوە، بەهۆی ئەم رێکارانەوە، لە چەند کاتژمێری رابردوودا 1400 مێگاوات کارەبا بۆ ناو تۆڕی کارەبای نیشتمانی گەڕایەوە و دۆخی کارەبا بەرەو ئاساییبوونەوە دەچێت.
بەرەبەیانی دوێنێ چوارشەممە (16ـی ئەیلوولی 2026)، کۆمپانیای دانەگاز بە بڕی 220 ملیۆن پێ سێجا، کە دەکاتە رێژەی 36%ـی هەناردەی کێڵگەکە، گازی کەمکردەوە. ئەم کەمکردنەوەیە کاریگەرییەکی خێرای لەسەر وێستگەکانی کارەبا دروستکرد و بووە هۆی دابەزینی ئاستی بەرهەمهێنان بە بڕی نزیکەی 1000 بۆ 1300 مێگاوات.
دوای دروستبوونی کێشەکەش، هەر دوێنێ پڕۆژەی رووناکی و وەزارەتی کارەبا رایانگەیاند؛ لە پەیوەندیی بەردەوامدان لەگەڵ دانەگاز و پرۆسەی زیادکردنەوەی گازەکە دەستیپێکردووەتەوە. هاوکات پێشبینیشیان کردبوو کە لە ماوەی 6 بۆ 8 کاتژمێردا کاتژمێرەکانی پێدانی کارەبا زیاد بکات و بگەڕێتەوە بارودۆخی پێش دابەزینی گازەکە.
