دیجیتاڵ
عێراق، گەیشتە ئەو وادەیەی کە ساڵانێک بوو جێگەی ناکۆکیی قووڵی لایەنە سیاسییەکانی بوو، ئەویش کۆتاییهێنانە بە ئەرکی شەڕکەریی نزیکەی 3,500 سەربازی ئەمریکی و هاوپەیمانان لە وڵاتەکەدا. حکومەتی عێراق ئەو رۆژەی بە "رۆژی سەروەری"ناوبرد و بەو بۆنەیەوە چوار رۆژ پشووی فەرمیی راگەیاند.
ریاز عەدای، پەرلەمانتاری رەوتی حیگمە، بەی رایگەیاند: "ئەمڕۆ کەرنەڤاڵە بۆ گەلی عێراق بە رۆیشتنی هێزەکانی ئەمریکا و هاوپەیمانان، چونکە دۆخی ئاسایشیی عێراق جێگیرە و ئەرکی ئەوانیش کۆتاییهاتووە."
بەڵام پرسی کۆتاییهێنان بە ئەرکی سەربازانی ئەمریکا و هاوپەیمانان، شەقامی عێراقی کردووەتە دوو بەرەوە و دۆخێکی تەمومژاویی دروستکردووە.
بەدیع عارف، دوکاندارێکە و پێی وایە: "لەمێژە داوای کشانەوەیان دەکەین، هەموو کێشەکانمان خەتای ئەمریکایە."لە بەرامبەردا، عەدنان عاسی کە خانەنشینە، دەڵێت: "هیوای ئاشتی و ئاوەدانکردنەوە بۆ عێراق دەخوازین بۆ بونیادنانی وڵاتێکی بەهێز."
هاوکات، هەندێک کەس گومانیان لە کشانەوەی هێزەکان هەیە. سالم هادی، فەرمانبەرێکە و دەڵێت: "کێ دەڵێت ئەمریکا دەکشێتەوە؟ هیچ کشانەوەیەک لە ئارادا نییە."
جێهێشتنی عێراق لەلایەن هێزەکانی ئەمریکا و هاوپەیمانانەوە، عێراقییەکانی کردووەتە دوو بەشەوە؛ بەشێکیان بە رۆژی سەروەریی عێراقی ناوی دەبەن و ئاهەنگ دەگێڕن، بەشەکەی دیکەش ترسیان هەیە جارێکی دیکە شانە نووستووەکانی داعش ئەو بۆشاییە ئەمنییەی لە هەندێک ناوچەی عێراق هەیە بیقۆزنەوە و وڵات بخەنە دۆخێکی مەترسیدارەوە.
ئێستا پرسیاری سەرەکی ئەوەیە، ئایا ئەو سوپایەی کە لە ساڵی 2014 نزیکەی 40%ی خاکی عێراقی لەدەستدا، دەتوانێت بە تەنیا پارێزگاری لە سەقامگیریی وڵاتەکەی بکات؟ ئەمە پرسیارێکە کە داهاتوو وەڵامی دەداتەوە.
