دیجیتاڵ
کلاسیکۆیە، هزر و بیر پێتڤییە ژ بلی یارییکرنێ و هەڤرکیکرنێ بۆ برنا سێ خاڵان ل سەر چ تشتەکێ دی نەبن، پێتڤییە هەموو کارکرن بۆ ڤەگەریانێ بن بۆ سەر رێیا سەرکەفتنێ، لێ ئەوا ئەز بەحس دکەم د یانەیا دهۆک دا نینە و د قۆناخا دووەمدا ناهێتە دیتن.
کارێن باش ب پلانێن باش و ئابوورییەکا بهێز و ئارام دهێنە کرن، دهۆکێ ئەو پلانە یا هەی یا بۆ سەرکەفتنێ پێتڤی، لێ ئەو ئابوورییە نینە، یا دبیتە پاڵنەرەکێ بهێز بۆ درێژیدان ب وێ پلانا کار ل سەر دهێتە کرن، پرسیارکرن بۆ من یا ساناهیە و دێ پرسم ل کی وڵاتێ جیهانێ و ل کیژان یانەیێ هەیە د کلاسیکۆیێدا کو ب ناڤ و دەنگترین یارییە ل هەر وڵاتەکێ، هزرا یاریزانان ل جهێ یاریکرنێ ل سەر پارەی و نەبوونا مووچەیان بیت؟ ل هەمی دنیایێ بەرپرسێن وڵاتان ب دیتنا یاریزانان شادبن و وێنەیان ل گەل دگرن، لێ ل ڤێرە یاریزان چاڤەرێنە بەرپرسەکی ببینن دا کو گازیێن خۆ بگەهیننێ.
دهۆک د قۆناخا یەکەمدا ب ئاستەکێ بلند دەرکەفت و ئەنجامێن باش دەستڤە ئینان، ئەز دزانم ئەو یانەیە د چ رەوشەکێدا دەربازبوو هەتا جارەکا دی ڤەگەریا خولا نایابا عێراقێ، ئەڤە بۆ هەموو کوردستانێ جهێ دڵخۆشیێ بوو، لێ هەتا چەند دهۆک دێ شێت بەردەوام بیت، ما یانە ب قەر و دەرووزیێ برێڤە دچن؟ رۆژەکێ سەرۆکێ یانەیێ پارە ل مالا خۆ ئینا، دوو رۆژا ژ کەس و نیاسێن خۆ وەرگرت، سێ رۆژان ل دەرگەهێن بەرپرسێن وڵاتی و باژێری دا، هەتا کەنگی دێ ئەڤ رەوشا یا بەردەوام بیت.
بگەهنە یانەیا دهۆکێ، رەوشا وێ گەلەک یا خراپە، یەکەمجارە دێ ڤان پێزانیان بێژم و کو ب راستیژی نەخوەش و ب باندۆرن، بەریا یاریا دهۆک و هەولێرێ بێتە کرن، یانەیا دهۆک ب هێڤیا ئەنجامدانا یاریێ نەبوو و هەوڵەکا بەردەوام ب رژی هەبوو بۆ وێ چەندێ یانە گەشتا خۆ بۆ هەولێر نەکەت، سەدەما یەکەم و دووەم و دوماهیێژی ئەوە یاریزانان مووچە وەرنەگرتنە، تنێ نیڤ مووچە ب وان هاتە دان بەس بۆ وێ چەندێ رازی ببن یاریێ بکەن.
دیڤ پێزانین من ئەگەر دهۆک ب ڤێ رەوشێ یا بەردەوام بیت، سەرۆکێ یانەیێ دێ یەکەم کەس بیت دەستا ژ کارێ خۆ بەردەت و دیر نینە یانە بکەڤیتە بن گەڤەکا مەزن یا ئەنجامێن خراپدا، لەوما پێتڤییە بەرپرسێن ڤی باژێری هندی زییە چارەکێ ل بارودۆخێ یانەیێ بکەن، ب تایبەت هەر یارییەکا بهێز بهێت کرن یاریگەهێن کوردستانێ یێ پڕ دبن ل پشتەڤا و گەنجێن ڤی وڵاتەی ژ وەرزشێ حەزدکەن.
ژ هەر تشتی مەترسیدارتر ئەوە ئەگەر چارەک ل ڤی بارودۆخی نەهێتە کرن، بۆ وەرزێ داهاتی دێ دهۆک یاریزانێن خۆیێن پیشەگەر ژ دەست دەت و ئیدی ئەو باوەریا هەی نامینیت، ب تایبەت یاریزانەکێ گۆڵکارێ وەک برێنس ئوپوکۆ، بەرەڤانەکێ وەکی مۆسێس لوکاس، نورۆ سولێ و هەر یاریزانەکێ دیکە.
مووچەیێ یاریزانێ سوپەر ل دهۆکێ ژ یاریزانەکێ زۆر ئاسایی ل یانەیەکا دیکە کێمتر، ئەو پارەیێ دهۆکێ دڤی وەرزیدا خەرجکری گەلەک کێمترە ژ وی پارەیێ بەشەکێ یانەیان د ڤەگوهاستان چەند یاریزانێن کێمدا خەرج دکەن، وە نیڤا یەکەم یا وەرزی دیت و دهۆک ل گەل وێ چەندێ کو زۆر دەمەکێ درێژبوو ژ خولا نایاب دوویرکەتبوو ڤەگەریا و بۆ سوپرایز و باشترین ئەنجام ئینان، لێ ل جهێ پشتەڤانیێ ژێ بکەن، وە چ کر؟ مانە گولێ ئەگەر رۆژانە ئاڤ نەدەی دێ سیس بیت؟ کا چەوا مرۆڤ بۆ تەندروستییەکا باش پێتڤی ب خارنەکا تەندروست هەیە، برێڤەبرنا یانەیەکا باشژی پێتڤی ب ئابوورییەکا باش هەیە، ڤێجا ئێدی بڕیارێ بدەن یان ژیان و تەندروستییەکا باش یان ژی چاڤەرێکرن ژ بۆ نەخۆشیێ و هەتا مرنێ.
