سەرۆکی چین، پێشبینی دەکات پێش کۆتاییهاتنی ئەمساڵ دوو دیداری دیکەی لوتکەی لەگەڵ سەرۆکی ئەمریکا هەبێت، هاوکات بانگهێشتی فەرمیی سەرۆکی ئەمریکا و هاوسەرەکەی کرد بۆ سەردانیکردنی چین.
هەینی، 25ـی ئەیلوولی 2026، شی جین پینگ، سەرۆکی چین، بە دەم چاخواردنەوەدا لەگەڵ دۆناڵد ترەمپ، سەرۆکی ئەمریکا، لە کۆشکی سپی، گوتی: ئەمساڵ دوو دەرفەتی دیکەمان لەپێشە بۆ سازدانی دیدار؛ یەکەمیان لە میانی کۆڕبەندی هاوکاریی ئابووریی وڵاتانی ئاسیا و زەریای هێمن (APEC) دەبێت لە چین، دووەمیشیان لە میانی بەڕێوەچوونی لوتکەی وڵاتانی گرووپی (G20) دەبێت لە ئەمریکا.
سەرۆکی چین, لە درێژەی گوتەکانیدا رووی لە سەرۆکی ئەمریکا کرد و گوتی:"جەنابی سەرۆک و خانمی یەکەم، زۆر بە گەرمی پێشوازی لە سەردانتان بۆ چین دەکەم."
لە لایەکی دیکەوە، دۆناڵد ترەمپ، جەختی لەوە کردەوە، کە گفتوگۆکانی نێوانیان پێشکەوتنێکی بەرچاوی بەدەستهێناوە کە لە بەرژەوەندیی هاوبەشی ئەمریکا و چیندایە.
ترەمپ، ئاماژەی بەوە کرد، پێموایە ئێمە هەنگاوی یەکجار گەورەمان بڕیوە و دەستکەوتی بەرچاو هاتوونەتە کایەوە، کە ئەمەش رەهەندێکی یەکجار ئەرێنییە بۆ هەردوو وڵات.
چوارشەممە 23ـی ئەیلوولی 2026، شی جین پینگ، سەرۆکی چین، بەرەو ئەمریکا بە رێ کەوت و بۆ رۆژی دواتر گەیشتە ئەو وڵاتە و لە لایەن دۆناڵد ترەمپەوە بە گەرمی پێشوازیی لێ کرا.
شی جین پینگ لە ماوەی سەردانە سێ رۆژیییەکەی بۆ واشنتن، ژمارەیەک دیدار و کۆبوونەوەی گرنگی لەگەڵ دۆناڵد ترەمپ، سەرۆکی ئەمریکا هەبوو، هەروەها هەردوولا پرسی پەیوەندییە بازرگانییەکانی نێوانیان و پێناسی گومرگییان تاوتوێ کرد.
شی جین پینگ دوای سەردانە سێ رۆژییەکەی بۆ ئەمریکا، ئێوارەی ئەمڕۆ هەینی 25ـی ئەیلوولی 2026، کۆتایی بە گەشتەکەی هێنا و گەڕایەوە و چین.
دۆناڵد ترەمپ، سەرۆکی ئەمریکا، سەردانەکەی شی جین پینگی بۆ واشنتن بەرزنرخاند و کۆبوونەوەکانی نێوانیشیان بە ئەرێنی و بە دەستکەوتێکی مەزن وەسف کرد.
