سەرۆکی ئەمریکا و سەرۆکوەزیرانی عێراق کۆبوونەوە و، تێیدا هەردوولا بە وردی رێگەکانی بەهێزکردنی پەیوەندییە دووقۆڵییەکان و پەرەپێدانی هەماهەنگیی نێوان هەردوو وڵاتیان لە بوارەکانی سیاسی، ئابووری و وەبەرهێناندا تاوتوێ کرد.
چوارشەممە، 23ـی ئەیلوولی 2026، عەلی زەیدی، سەرۆکوەزیرانی عێراق، لە پەراوێزی کۆبوونەوەکانی کۆمەڵەی گشتیی نەتەوە یەکگرتووەکان لە شاری نیویۆرک، لەگەڵ دۆناڵد ترەمپ، سەرۆکی ئەمریکا کۆبووەوە.
بە پێی راگەیەنراوی نووسینگەی سەرۆکوەزیرانی عێراق، لە کۆبوونەوەکەدا، بە وردی تاوتوێی پەیوەندییە دووقۆڵییەکانی نێوان بەغدا و واشنتن کرا، هاوکات باس لە میکانیزمەکانی بەهێزکردنی هاوکاری و پتەوکردنی هەماهەنگیی نێوان هەردوو وڵات کرا، بە تایبەتی لە سێکتەرە گرنگەکانی وەک بواری سیاسی، ئابووری و هاندانی وەبەرهێنانی هاوبەش.
لە بەشێکی دیکەی کۆبوونەوەکەدا، هەردوولا پێداچوونەوەیان بۆ دوایین پێشهات و ئاڵۆزییەکانی بارودۆخی ناوچەکە کرد؛ لەو چوارچێوەیەشدا تیشک خرایە سەر ئەو هەوڵە هاوبەشانەی کە لە لایەن عێراق و ئەمریکاوە دەدرێن بە مەبەستی چەسپاندنی ئاسایش، بەهێزکردنی سەقامگیریی هەرێمی، نێودەوڵەتی و رێگریکردن لە پەرەسەندنی گرژییەکان لە رۆژهەڵاتی ناوەڕاستدا.
