سبەی پێنجشەممە لە پارکی دەروازەی ئیدارەی سەربەخۆی راپەڕین؛ سێیەمین فێستیڤاڵی بەرهەمە خۆماڵییەکان لەژێر ناونیشانی "گەشت و کاڵ"دەستپێدەکات. بەڕێوەبەری گشتی کشتوکاڵی راپەڕینیش رایدەگەیەنێت، زیاتر لە 150 کۆمپانیا و جووتیار بەشداری تێدا دەکەن و ئامانجیان ساخکردنەوەی بەرهەمی ناوخۆیی و راکێشانی گەشتیارانە.
چوارشەممە، 23ـی ئەیلوولی 2026، ئەحمەد حەکیم، بەڕێوەبەری گشتی کشتوکاڵی راپەڕین لە لێدوانێکدا تایبەت بەـی راگەیاند: "ماوەی 20 رۆژە ئامادەکاری زۆر باشمان کردووە لەلایەن لێژنەی ئامادەکار و سەرپەرشتیاری فێستیڤاڵەکەوە. فێستیڤاڵەکە سێیەمین فێستیڤاڵی بەرهەمە خۆماڵییەکانە و بە ناوی 'گەشت و کاڵ' ئاوێتەکردنی گەشتوگوزار و کشتوکاڵە، بە هەماهەنگی بەڕێوەبەرایەتی گشتی کشتوکاڵی راپەڕین، بەڕێوەبەرایەتی گشتی گەشتوگوزاری راپەڕین، کۆمپانیایەکی تایبەت و پێشانگەی نێودەوڵەتی سلێمانی بەڕێوەدەچێت."
ئاماژەی بەوەش دا: "دەمەوێت کارێکی جوان و ناوازە بکەین لە ئاستی گەورەیی ئیدارەی راپەڕین و خەڵکە قوربانیدەرەکەی، چونکە ئەم ناوچەیە ناوچەیەکی زۆر گرنگی هەم گەشتیاری هەم کشتوکاڵییە. هاوکات سوپاسی لایەنە پەیوەندیدارەکانی دیکەش دەکەین کە هاوکارمان بوون."
سەبارەت بە کات و شێوازی بەڕێوەچوونی فێستیڤاڵەکە، بەڕێوەبەری گشتی کشتوکاڵی راپەڕین گوتی: "فێستیڤاڵەکە سێ رۆژ بەڕێوەدەچێت، بەیانی پێنجشەممە 24ـی ئەیلوول کاتژمێر 10ـی بەیانی دەستپێدەکات و رۆژانی 24، 25 و 26ـی ئەیلوول بەردەوام دەبێت. هەموو جۆرە بەروبوومێکی گەشتیاری و کشتوکاڵی تیایدا نمایش دەکرێت و ئامانجمانە نەک تەنیا خەڵکی سنوورەکە، بەڵکوو هەموو کوردستان بێن بۆ سەردانیکردنی فێستیڤاڵەکە و بەرهەمە سروشتی و ئۆرگانیکییەکانی سنووری ئیدارەی راپەڕین ببینن."
ئەحمەد حەکیم روونیشیکردەوە: "بەشداربووان لەچاو دوو ساڵی رابردوو زۆر زیاترن و ئێمەش سوودمان لە هەڵەکانی دوو ساڵی رابردووی خۆمان بینیوە. تا ئێستا 150 کۆمپانیا و جووتیار ناوی خۆیان تۆمار کردووە بۆ ئەوەی بەشداربن و بەرهەمەکانیان نمایش بکەن. ئامانجی سەرەکیمان لەم جۆرە فێستیڤاڵانە نمایشکردنی بەرهەمی ناوخۆی سنوورەکە و ساخکردنەوەی بەرهەمی جووتیارانە."
فێستیڤاڵەکە لە پارکی دەروازەی راپەڕین بەڕێوەدەچێت و سبەی 150 کەپر ئامادەکراوە، ئەگەرچی داواکاری هەبووە کەپری زیاتر ئامادەبکرێت. هەروەها بەشێک لە کەپرەکان خواردنی کوردەواری و خواردنی دیکەی لێ دەفرۆشرێت.
ئەم جۆرە فێستیڤاڵانە بەشێکە لە ستراتیژی کابینەی نۆیەمی حکوومەتی هەرێمی کوردستان لە رێگەی وەزارەتی کشتوکاڵ و دەستەی گەشتوگوزارەوە، کە پەرەی پەرەپێدەدرێت بە مەبەستی هێنانی گەشتیاران بۆ ناوچە جیاوازەکانی هەرێم و ناساندن و ساخکردنەوەی بەروبوومی کشتوکاڵی جووتیارانی ناوخۆ.
