دووەمین دیداری رۆشنبیری بامەرنێ، بە پێشکەشکردنی 69 لێکۆڵینەوە لەژێر ناونیشانی "هەمەجۆریمان سەرچاوەی هێزمانە"، لە ناحیەی بامەرنێ سەر بە پارێزگای دهۆک بەڕێوەدەچێت.
سێشەممە، 22ی ئەیلوولی 2026، عەبدولرەحمان بامەرنێ، یەکێکە لە رێکخەرانی دیدارەکە بەی راگەیاند، "دیداری رۆشنبیری بامەرنێ بۆ دووەمین ساڵ بە بەشداریی توێژەران و رۆشنبیران، لە ناحیەی بامەرنێی سەر بە قەزای ئامێدی بەڕێوەدەچێت و ئەمساڵ 69 لێکۆڵینەوە لەسەر ناسنامەی لاوان و رۆڵی ئەو ناسنامەیە لە دروستکردنی کۆمەڵگەیەکی یەکگرتوو پێشکەش دەکرێن."
سەبارەت بە بەرنامەی دیدارەکە، عەبدولرەحمان بامەرنێ دەڵێت، "بەپێی بەرنامەی دیدارەکە، لە ماوەی دوو رۆژدا سێ خولی جیاواز بۆ پێشکەشکردنی لێکۆڵینەوەکان بەڕێوەدەچێت و توێژەران لەسەر لایەنە جیاوازەکانی ناسنامەی لاوان و چۆنیەتی بەهێزکردنی هەستی هاوبەشی و یەکگرتوویی گفتوگۆ دەکەن."
رێکخەری دیدارەکە روونیکردەوە، "بیرۆکەی رێکخستنی ئەم دیدارە لەلایەن گروپی "ماڵا بامەرنیان"ەوە سەریهەڵداوە؛ گروپێکی خۆبەخشییە کە پێشتر چەندین چالاکیی لە بوارە جیاوازەکاندا ئەنجام داوە. هەروەها بامەرنێ لە ناوچەی بادینان بە شوێنێکی ناسراو بە رۆشنبیری و خوێندن و زانست دادەنرێت و یەکێک لە چالاکییە گرنگەکانی ئەم گروپە، یادکردنەوەی سەد ساڵی خوێندن لە بامەرنێ بووە؛ چونکە یەکەم قوتابخانەی فەرمی لە بامەرنێ لە ساڵی 1922 کرایەوە."
سەبارەت بە دامەزراندنی ئەو بیرۆکەیە، عەبدولرەحمان بامەرنێ دەڵێت، "بیرۆکەکەمان ئەوە بووە چالاکییەکی رۆشنبیری و زانستی دابمەزرێنین کە سوودی بۆ تەواوی هەرێمی کوردستان هەبێت، بۆیە بڕیارمان داوە هەموو ساڵێک بابەتێک دیاری بکەین و لە رێگەی لێکۆڵینەوە و خوێندنەوەوە لەسەری گفتوگۆ بکەین. بۆ ئەمساڵیش بابەتی ناسنامە هەڵبژێردراوە و دروشمی دیدارەکەش "هەمەجۆرییەکانمان سەرچاوەی هێزمانن"ە."
عەبدولرەحمان بامەرنێ جەختی لەوەش کردەوە، "لە ساڵی رابردوودا دیداری رۆشنبیری بامەرنێ بە پێشکەشکردنی 43 لێکۆڵینەوە بەڕێوەچوو، بەڵام ئەمساڵ ژمارەی لێکۆڵینەوە پێشکەشکراوەکان گەیشتووەتە 69 لێکۆڵینەوە، هۆکاری نیشانەی زیادبوونی دیدارەکەش گرنگیدان بە توێژینەوە و بابەتە رۆشنبیرییەکانە."
بامەرنێ باس لە ئامانجی دیدارەکە دەکات و دەڵێت، "دیداری رۆشنبیری بامەرنێ، لە ماوەی دوو رۆژدا بە بەشداریی توێژەران و رۆشنبیران بەڕێوەدەچێت و ئامانجی سەرەکیی ئەمساڵی بریتییە لە تاوتوێکردنی ناسنامەی لاوان و رۆڵی جۆراوجۆرییە کۆمەڵایەتی و کولتوورییەکان لە بەهێزکردنی ناسنامەیەکی یەکگرتوو."
دووەمین دیداری رۆشنبیری بامەرنێ، بڕیارە رۆژی چوارشەممە، 23ی ئەیلوولی 2026، لە ناحیەی بامەرنێ سەر بە پارێزگای دهۆک بەڕێوەدەچێت و ماوەی دوو رۆژ بەردەوام دەبێت.
