ئەمڕۆ پێنجشەممە 17ـی ئەیلوولی 2026، فێستیڤاڵی بەرهەمە خۆراکی و سروشتییەکان لە شارۆچکەی ئاکرێ دەست پێدەکات و بۆ ماوەی سێ رۆژ بەردەوام دەبێت. ئامانجی سەرەکیی فێستیڤاڵەکە گرنگیدانە بە بەرهەمی ناوخۆیی، پشتیوانیکردنی جووتیاران، و خستنەڕووی توانا و بەرهەمی بەرهەمهێنەرانی ناوچەکەیە.
شارۆچکەی ئاکرێ یەکێکە لە ناوچە هەرە دەوڵەمەندەکانی کوردستان لە رووی بەرهەمی کشتوکاڵییەوە. لە فێستیڤاڵەکەی ئەمساڵدا تەواوی بەرهەمە سروشتی و خۆماڵییەکانی ئاکرێ نمایش دەکرێن و هاووڵاتییان دەتوانن بە نرخێکی هەرزانتر لە بازاڕ، بەرهەمەکان بکڕن. ئەمەش هەنگاوێکی گرنگە بۆ بووژانەوەی بازاڕی ناوخۆیی و دەرخستنی سیمایەکی جوانتری دەڤەری ئاکرێ.
فازڵ مستەفا، بەڕێوەبەری کشتوکاڵی ئاکرێ و رێکخەری فێستیڤاڵەکە، لە لێدوانێکدا بەـی راگەیاند: "ئەمە قۆناخی دووەمە و تەواوی ئامادەکارییەکان کراون، ئەمڕۆ کاتژمێر 10:30ـی بەیانی فێستیڤاڵەکە بەڕووی میوانان و هاووڵاتییاندا دەکرێتەوە".
بەڕێوەبەری کشتوکاڵی ئاکرێ ئاماژەی بەوەش دا، شوێنی فێستیڤاڵەکە دەکەوێتە نزیک عەلوەی هاوچەرخی ئاکرێ و تاوەکو درەنگانی شەوی شەممە بەردەوام دەبێت. جەختیشی کردەوە، فێستیڤاڵی ئەمساڵ جیاوازتر، گەورەتر و فراوانترە لە ساڵانی رابردوو و بەرهەمی زۆر جۆراوجۆرتر لەخۆ دەگرێت.
