گوتەبێژی حکوومەتی هەرێمی کوردستان دەڵێت، مەسرور بارزانی و قوباد تاڵەبانی لەبارەی پێکهێنانی کابینەی دەیەم کۆبوونەتەوە. جەختیش دەکاتەوە، پێویستە مووچەی فەرمانبەرانی کوردستان لە بودجەی 2027ـی عێراق گەرەنتی بکرێت.
ئەمڕۆ چوارشەممە، 16ـی ئەیلوولی 2026، ئەنجوومەنی وەزیران بە سەرپەرشتیی مەسرور بارزانی، سەرۆکی حکوومەتی هەرێمی کوردستان و ئامادەبوونی قوباد تاڵەبانی، جێگری سەرۆکوەزیران کۆبووەوە. دواتر پێشەوا هەورامانی، گوتەبێژی حکوومەتی هەرێمی کوردستان لە کۆنفرانسێکی رۆژنامەوانیدا ئەنجامی کۆبوونەوەکەی خستەڕوو.
رەتکردنەوەی بڕیارێکی بەغدا
گوتەبێژی حکوومەت رایگەیاند، "بەڕێز وەزیری پلاندانان باسی بابەتی ئاماری کرد، ئەوەی کە بریاڕێک دراوە گوایە رێژەی دانیشتووانی هەرێمی کوردستان بەو جۆرە نەبێت کە لە ناو سەرژمێریدا هەیە و زیاتر لە 14%ـە، بەڵکوو حکوومەتی فیدراڵ بریاڕێکی دیکە دەدا کە 12% بێت. ئەمە غەدرێکی زۆر زۆر روون و وازحە لە خەڵکی هەرێمی کوردستان، بۆیە لەسەر ئەم مەسەلەیەش حکوومەتی هەرێمی کوردستان زۆر راوەستا، بەڕێز سەرۆکی ئەنجوومەن، بەڕێز جێگر و هەروەها وەزیرەکان قسەیان لەسەر کرد".
گوتیشی، "حکوومەتی هەرێمی کوردستان بە تەواوی ئەم بریاڕە رەتدەکاتەوە؛ چ پەیوەندیمان لەگەڵ بەڕێز جەنابی سەرۆکوەزیرانی حکوومەتی فیدراڵ بەڕێز زەیدی، چ رێگەی یاسایی و هەر شتێک پێویست بێت، بۆ ئەم بابەتە دەیکەین. بەتایبەت داوامان لە هەموو فراکسیۆنە کوردستانییەکان هەیە لە ئەنجوومەنی نوێنەرانی عێراق. ئەمە بابەتیەکی سیاسی نییە، پەیوەندی بە هیچ حیزب و لایەنێکەوە نییە، ئەمە غەدرێکە بەرامبەر بە خەڵکی هەرێمی کوردستان دەکرێت کە بێگومان کاریگەرییەکی زۆر خراپی دەبێت لە هەموو روویەکەوە بۆ سەر هەرێمی کوردستان".
هەورامانی ئەوەشی خستەڕوو، "12.68% کە دیاری کراوە پێچەوانەی ئەو سەرژمێرییەیە کە حکوومەتی فیدراڵ خۆی ئەنجامی داوە و خۆی سەرپەرشتی ئەنجامدانی کردووە، بە بێ ناوچە کوردستانییەکانی دەرەوەی ئیدارەی هەرێم، بۆیە ئێمە وەکو حکوومەتی هەرێمی کوردستان بە تەواوتی ئەمە رەتدەکەینەوە".
بڕیارێکی تایبەت بە خوێندنی باڵا و پەروەردە
گوتەبێژی حکوومەت گوتی، "ئەو فەرمانبەرانەی لە وەزارەتی پەروەردە یان خوێندنی باڵا دامەزراون لەسەر داهاتی ناوخۆ و بەهەر هۆکارێک وازیان لە کارەکانییان هێناوە؛ بە بڕیاری ئەنجوومەنی وەزیران دەکرێت شوێنەکانیان پڕ بکرێتەوە".
کۆبوونەوەکانی شاندی حکوومەت و "هەژماری من"
هەورامانی باسی لەوە کرد، لە ماوەی رابردوودا، شاندی دانوستانکاری حکوومەتی هەرێمی کوردستان لەگەڵ لایەنە سیاسییەکانی هەرێمی کوردستان کۆبوونەتەوە و بە کورتی باسیان لەم بابەتانە کردووە:
یەکەم: دەبێت مووچە لە ناو پرۆژەیاسای بودجەی ساڵی 2027، لەگەڵ مووچەی فەرمانبەرانی عێراق گەرەنتی بكرێت و دەستکاریی مووچەی فەرمانبەرانی هەرێمی کوردستان نەکرێت.
دووەم: ئەو شایستە داراییانەی مافی خەڵکی هەرێمی کوردستانن و بەپێی دەستوور پێشتر نەدراون، بە کە بەپێی دەستوور مافی ئێمەن، پێمان بدرێنەوە. دیسانەوە پێویستە هەموو فراکسیۆنە کوردستانییەکان لەسەر ئەم پرسانە یەکدەنگ و یەکهەڵوێست بەرگری لە مافی خەڵکی هەرێمی کوردستان بکەن و رێگە نەدەن ئەو مافەی پێشتر خوراوه، دووبارە تووشی هەمان چارەنووس بێتەوە.
گوتەبێژی حکوومەتی هەرێمی کوردستان باسی لەوەش کرد، "ئەو شتانەی دادگای فیدراڵی لە ئێمەی داواکردبوو، بە تایبەت لە بابەتی مووچەدا، پابەندیی تەواومان بۆ نواندووە و هەموو ئەرکەکانی سەرشانمان جێبەجێ کردووە".
لەبارەی پڕۆژەی "هەژماری من"ـیش، گوتەبێژی حکوومەت گوتی، "بەڕێز جەنابی سەرۆکوەزیران دوێنێ رایگەیاند، مووچەی فەرمانبەرانی هەرێمی کوردستان ئێستا ئەوانەی کە مووچەخۆرن لە رێگەی بانکەوە، یەک ملیۆن کەسی تێپەڕاندووە. ئێستا یەک ملیۆن کەس، لە رێگەی ئامێرەکانی "ئەی تی ئێم"ـەوە مووچە وەردەگرن".
پێکهێنانی کابینەی دەیەم
لەبارەی پێکهێنانی کابینەی دەیەم، هەورامانی گوتی، "جەنابی کاک مەسرور و جەنابی کاک قوباد، بەڵێ کۆبوونەوەیەکیان هەبووە، پێکەوە، و کۆبوونەوەیەکی باشیان هەبووە و حاڵەتێکی ئاساییە، ئەوان سەرۆکوەزیران و جێگری سەرۆکوەزیرانن پێکەوە کۆبوونەوە ئەنجام بدەن. لە بابەتی پێکهێنانی حکوومەت، جەوێکی باش هەیە".
گوتیشی، "پۆست و وەزارەت و ئەو دابەشکردنەی کە باسی لێوە دەکرێت، شتی وا نییە؛ بەڵام لێکنزیکبوونەوەیەکی زۆر باش هەیە لە نێوان پارتی و یەکێتیدا و کۆبوونەوەی نێوان جەنابی کاک مەسرور و کاک قوباد، کۆبوونەوەیەکی باش بوو، لەوانەیە ئێمە گەشتبینە ئەوەی کە لە قۆناخی داهاتوودا لەسەر ئەوە قسە دەکرێت چی بۆ کێ بێت؛ بەڵام ئێستا زەمینەیەکی زۆر باش لە هەموو کاتێک باشتر، لە ماوەی رابردوودا هەیە بۆ پێکهێنانی حکوومەت".
کێشەی بەنزین
گوتەبێژی حکوومەت ئەوەی خستەروو "مەسەلەی بەنزین کێشەیەک نییە کە حکوومەتی هەرێمی کوردستان خولقاندوویەتی، ئەمڕۆش قسەمان لەسەری کرد لە ئەنجوومەنی وەزیران. بەڕێز وەزیری نەوت باسی کرد کە داوامان کردووە لە حکوومەتی فیدراڵ. یەکێک لەو بابەتانەی کە ئێمە دانوستانی دەکەین لەگەڵ حکوومەتی فیدراڵ کە شاندی ئێمە چوونەتە بەغدا".
جەختیشی کردەوە، "پێویستە ئەو 50 هەزارە بۆ ئێمە زیاد بکرێت، ئەوانیش تێگەیشتوون کە 50 هەزار بەشی ئێمە ناکات؛ بەڵام تەنها بڕیارێکی پێویستە. یان ئەوەی وەکو ناوچەکانی دیکەی عێراق، مامەڵە لەگەڵ هەرێمی کوردستان بکەن. یان ئەوەیە، ئەبێت چارەسەرێک بدۆزنەوە بۆ ئێمەش، بۆیە 50 هەزار بەرمیلەکە دوێنێش، چەند رۆژی پێشووش وەزیری ئێمە لەسەر هێڵ بووە لەگەڵ ئەوان، و ئێمە لە هەوڵی چارەسەریداین".
گوتیشی، "ئەم کێشەیەش چارەسەر دەکرێت ئینشائەڵڵا. گرنگ ئەوەیە یەکەم شت حکوومەتی هەرێمی کوردستان نەیهێشت ئەم ئەزمە قووڵە درێژە بکێشێت. راستە نرخەکە، ئەوە نییە ئێمە لێی رازی بین، پیمان خۆش نییە و لە هەوڵی چارەسەرداین؛ بەڵام ئێستا وەک ئەزمە، ئەزمە نییە، حکوومەتی هەرێمی کوردستان بەنزینی 750 دیناری دابەش کردووە، بەنزینێکی زۆر، کوالێتی باشە و خەڵکیش لێی رازییە، و چارەسەریشمان کردووە؛ بەڵام لە بازاڕی ئازاددا لەوانەیە نرخەکە بەو جۆرە نەبێت کە ئێمە داوای دەکەین و ئەویش دەیهێنینە خوارەوە".
