هەوڵەکان بۆ چارەسەرکردنی کیشەی سووتەمەنی چرکراوەتەوە و جێگری سەرۆکی پەرلەمانی عێراق هەوڵەکانی چارەسەرکردنی کێشەی دارایی و سووتەمەنی دەخاتەڕوو.
دکتۆر فەرهەد ئەتروشی، جێگری سەرۆکی پەرلەمانی عێراق، لە لێدوانێکی تایبەت بۆ، باسی نوێترین هەوڵەکان بۆ چارەسەرکردنی کێشە داراییەکانی هەرێمی کوردستان و دابینکردنی موچە و بابەتی کێشەی بەنزینی کرد.
دکتۆر فەرهاد ئەتروشی گوتی شاندی حکوومەتی هەرێمی کوردستان لە ماوەی رۆژانی رابردوودا لە بەغدا چەندین کۆبوونەوەی لەگەڵ لایەنە سیاسییەکان و حکوومەتی فیدراڵی ئەنجام داوە، بۆ ئەوەی ماف و شایستە داراییەکانی هەرێم لە بودجەی ساڵی 2027ـی عێراق جێگیر بکرێت.
گوتیشی، پێشنیازەکانی هەرێمی کوردستان لەبارەی بودجە، دامەزراندن و بابەتە داراییەکان، بە شێوەی رەشنووس ئامادە کراون و بۆ ئەنجوومەنی وەزیرانی عێراق نێردراون. ئەگەر پەسەند بکرێن، وەک پرۆژەیاسا بۆ پەرلەمانی عێراق دەنێردرێن، بەڵام بەهۆی بارودۆخی سیاسیی عێراق، پرۆسەکە رەنگە چەند مانگ بخایەنێت.
لەبارەی موچەی فەرمانبەرانی هەرێمی کوردستان، ئەتروشی گوتی ئەم بابەتە لە گرنگترین داواکارییەکانی هەرێمە و لە هەفتەی داهاتوودا لەگەڵ وەزیری دارایی عێراق پێداگری لەسەر ئەوە دەکرێت کە ئەگەر بە هەمان میکانیزمی ئێستا بە لێبرینی بڕی 120 ملیار دینار،موچەی فەرمانبەرانی کوردستان دەنێردرێت پێویستە هاوشێوەی فەرمانبەرانی عێراق مووچە بۆ هەرێمی کوردستانیش بە بێ دواکەوتن دابین بکرێت.
جەختیشکردەوە، موچەی فەرمانبەرانی هەرێم دەبێت وەک پارێزگاکانی دیکەی عێراق، هەر 30 ڕۆژ جارێک بنێردرێت، نەک وەک ئێستا کە هەندێک جار 45 تا 50 ڕۆژ دوا دەکەوێت.
لە هەمان کاتدا، کێشەی بەنزینیش یەکێکە لە بابەتە سەرەکییەکانی گفتوگۆ لەگەڵ بەغدا. ئەتروشی وتی داواکاری هەرێم ئەوەیە پشکی بەنزین بۆ هەرێم زیاد و جێگیر بکرێت، بۆ ئەوەی پێداویستییەکانی ناوخۆ دابین بکرێت.
ئاماژەی بەوەشکرد پشکی هەرێمی کوردستان بە ڕێژەی سەدا 17.7 دیاریکراوە، کە دەبێتە نزیکەی 120 هەزار بەرمیل لە رۆژێکدا، بەڵام لە ئێستادا تەنها نزیکەی 50 هەزار بەرمیل بۆ هەرێم دەنێردرێت.
ئەو روونیکردەوە کە پێشنیازەکانی هەرێم گەیەندراوەتە لیژنەی نەوت و گازی پەرلەمان و وەزیری نەوتی عێراق و بە نووسراو بۆ ئەنجوومەنی وەزیران و سەرۆکی حکوومەتی عێراق نێردراون و رەزامەندی لەسەر دراوە، بەڵام جێبەجێکردنیان بەهۆی هەندێک بڕیار و هەڵوێستی سیاسی لە بەغداوە هێشتا راگیراوە و دەشڵێت، ئەو پرسە تەنیا بە رێککەوتنی تەکنیکی یەکلایی ناکرێتەوە، بەڵکو پێویستی بە بڕیاری سیاسی و جێبەجێکردنی رێککەوتنەکەیە.
