دیجیتاڵ
ئەنجوومەنی وەزیرانی عێراق بەفەرمی داوا لەوەزارەت و فەرمانگە و پارێزگاکان دەکات کە بۆ پلانی داهاتوویان پشت بەزانیارییەکانی سەرژمێریی گشتیی دانیشتووان ببەستن، بەگوتەی ئەندامێکی پەرلەمانی عێراق، ئەو هەنگاوە کاریگەری لەسەر چەسپاندنی رێژەی 14.14%ـی هەرێمی کوردستان دەبێت.
بەگوێرەی نووسراوێکی فەرمانگەی کاروباری ئەنجوومەنی وەزیران و لیژنەکان لەئەنجوومەنی وەزیرانی عێراق، کە لە 8ـی ئەیلوولی 2026 ئاراستەی سەرجەم وەزارەت و دامەزراوە و پارێزگاکان کراوە، داوایان لێکراوە پشت بەئەنجامی سەرژمێریی گشتیی دانیشتووانی ساڵی 2024 ببەستن وەک بنەمایەکی زانیاریی بنەڕەتی بۆ پلاندانان و هاوئاهەنگیی نێوان وەزارەتەکان بۆ نوێکردنەوەی پلانە ستراتیژییەکانیان، کە دەبێت لەسەر بنەمای زانیاریی دیمۆگرافی و کۆمەڵایەتی و ئابووریی سەرژمێریی گشتیی دانیشتووان بێت.
لە 13ـی ئەیلوولی 2026 ئەو نووسراوە لەرێگەی نوێنەرایەتیی حکومەتی هەرێمی کوردستانەوە لەبەغدا ئاراستەی ئەنجوومەنی وەزیرانی هەرێمی کوردستان کراوە.
پۆڵا سیروان دێرەشەیی، ئەندامی پەرلەمانی عێراق بەتۆڕی میدیاییی راگەیاند، ئەو نووسراوە پشتیوان دەبێت بۆ ئەو 14.14%ـەی کە هەرێمی کوردستان وەک بەشە بودجەی گشتیی عێراق لەبری 12.67% داوای دەکات.
بەگوێرەی ئەو سەرژمێرییە دانیشتووانی هەرێمی کوردستان 14.14%ـی تێکڕای ژمارەی دانیشتووانی عێراقە، حکومەتی هەرێمی کوردستان لەهەوڵی ئەوە دایە رێژەی پشکەکەی لەبودجەی گشتیی 2027 بکاتە 14.14٪ لەبری 12.67% کە لەبودجەی سێ ساڵی رابردووی عێراق پەیڕەو کراوە.
پۆڵا سیروان دێرەشەیی رایگەیاند، 22ـی ئەیلوول شاندێکی پەرلەمانتاران لەگەڵ نووری مالیکی، سەرۆکی هاوپەیمانیی دەوڵەتی یاسا کۆبوونەتەوە و تاوتوێی چەسپاندنی رێژەی 14.14%ـی پشکی هەرێمی کوردستانیان کردووە، ئەویش پێی راگەیاندوون پەرلەمانتارەکانی رادەسپێرێت بەئاراستەی چەسپاندنی ئەو رێژەیە لەپرۆژەیاسای بودجەی گشتی کار بکەن.
وەزارەتی دارایی و ئابووریی حکومەتی هەرێمی کوردستان رەشنووسی پێشنیاری خۆی بۆ پشکی بودجە رادەستی وەزارەتی دارایی عێراق کردووە لەسەر بنەمای رێژەی 14.14%، بەوپێیە پێویستە بەغدا ساڵانە زیاتر لە 23 تریلیۆن دینار وەک پشکی هەرێمی کوردستان دیاری بکات، کە هەردوو خەرجیی وەبەرهێنان و بەکارخستن دەگرێتەوە.
