دیجیتاڵ
بەڕێوەبەری گشتیی رێگەوبان و گواستنەوەی پارێزگای کرماشان رایگەیاند، لە ماوەی نیوەی یەکەمی ئەم ساڵدا زیاتر لە پێنج ملیۆن و 550 هەزار تۆن کاڵا لە پارێزگاکەوە بۆ شار و ناوچە جیاوازەکانی ئێران گواستراونەتەوە.
عەلی سەلیمی، بەڕێوەبەری گشتیی رێگەوبان و گواستنەوەی پارێزگای کرماشان، رۆژی دووشەممە، 28ـی ئەیلوولی 2026 راگەیاند: "لە شەش مانگی یەکەمی ئەم ساڵدا لە رێگەی بڕینی 356 هەزار پسووڵەی بارکردن، پێنج ملیۆن و 553 هەزار تۆن کاڵا و پێداویستی لە سنووری پارێزگاکەمانەوە بۆ شارەکانی دیکەی ئێران رەوانە کراون."
بە گوتەی سەلیمی، 164 هەزار تۆن لەو کاڵایانە کەرەستە و مادەی کانزایی بوون و نزیکەی دوو هەزار تۆنیش بە بارهەڵگری بچووک (وانێت) گواستراونەتەوە.
بەڕێوەبەری گشتیی رێگەوبانی کرماشان ئاماژەی بە گرنگیی تۆڕی رێگەوبانی پارێزگاکە کرد و روونیکردەوە کە 92%ـی پرۆسەی گواستنەوە لە کرماشان بە رێگەی وشکانی و بارهەڵگرەکان دەکرێت؛ لە کاتێکدا تەنیا 5%ـی لە رێگەی ئاسمانی و 3%ـی لە رێگەی هێڵی شەمەندەفەرەوە دەکرێت.
پارێزگای کرماشانی رۆژهەڵاتی کوردستان نزیکەی دوو ملیۆن دانیشتووی هەیە و بە رووبەری زیاتر لە 25 هەزار کیلۆمەتری چوارگۆشە، نزیکەی 1.5%ـی کۆی خاکی ئێران پێکدەهێنێت. ئەو پارێزگایە خاوەنی هەشت هەزار و 50 کیلۆمەتر تۆڕی رێگەوبانە، کە پێنج هەزار و 220 کیلۆمەتری رێگەی گوندەکانە و 467 کیلۆمەتریشی رێگەی خێرایە (ئۆتۆبان).
