وەزارەتی پێشمەرگە نیگەرانیی خۆی لە کشانەوەی هێزەکانی ئەمریکا بەبێ دابینکردنی سیستمی بەرگری دەربڕی و، رایگەیاند، پاراستنی ئاسمانی هەرێمی کوردستان ئەرکی حکوومەتی فیدراڵییە و پێشمەرگەش ئامادەیە بۆ هەر پێشهاتێکی نوێ.
ئەمڕۆ دووشەممە، 28ـی ئەیلوولی 2026، وەزارەتی پێشمەرگەی حکوومەتی هەرێمی کوردستان لە راگەیەنراوێکدا، رایگەیاند، رۆژی 30ـی ئەیلوول هێزەکانی ئەمریکا لەسەر خاکی عێراق و هەرێمی کوردستانیش دەکشێنەوە. روونیشی کردەوە، ئەم کشانەوەیە دەرئەنجامی لێکتێگەیشتنی هاوبەشی حکوومەتی فیدراڵیی عێراق و ئەمریکا و هاوپەیمانانە.
وەزارەتەکە، ئاماژەی بەوە دا، کشانەوەی هێزەکانی ئەمریکا و هاوپەیمانان لە عێراق لە کاتێکی هەستیاردایە، بەتایبەتی بارودۆخی ئاسایشی عێراق و رۆژهەڵاتی ناوەڕاست ناسەقامگیرە و پێویستی بە هۆشیاری و بڕیاردانی سیاسیی دروست هەیە. باسی لەوەش کردووە، بەردەوامبوونی ناسەقامگیریی دۆخی ناوچەکە هەڕەشەیە بۆ سەر تەواوی رۆژهەڵاتی ناوەڕاست.
لە راگەیەنراوەکەدا هاتووە، لە کاتی شەڕی نێوان ئەمریکا و ئێران لە مانگەکانی رابردوودا، هەرێمی کوردستان زیاتر لە هەزار جار رووبەڕووی هێرشی درۆنی و مووشەکی بالیستی بووەتەوە و بەشێکیان لەسەر ناوچە مەدەنییەکان کەوتنە خوارەوە. بەهۆی ئەم هێرشانەشەوە چەندین کەس گیانیان لەدەست دا و بریندار بوون، شانبەشانی زیانی گەورەی ماددی.
وەزارەتی پێشمەرگە، ئەوەی خستەڕوو، جێهێشتنی هەرێمی کوردستان لە لایەن ئەمریکاوە لە دۆخێکی ئاڵۆزی ناوچەییدا بەبێ دابینکردنی هیچ سیستمێکی بەرگری، مایەی نیگەرانییە. لە هەمان کاتدا دڵنیان ئاسمانی هەرێمی کوردستان وەک بەشێک لە ئاسمانی عێراق، ئەرکی لەپێشینەی حکوومەتی فیدراڵییە و دەبێت بەرپرسیارێتیی پاراستنی ئاسمانی هەرێمی کوردستان لە کاتی پێویستیدا لە ئەستۆ بگرێت.
وەزارەتی پێشمەرگە، دووپاتی کردەوە، وەک چۆن لە رابردوودا پارێزەری خاک و خەڵکی کوردستان بوون، لە داهاتووشدا بۆ هەر ئەگەر و پێشهاتێکی نوێ ئامادەن و دەتوانن لەگەڵ هەر بارودۆخێکی نەخوازراودا خۆیان بگونجێنن و رووبەڕووی مەترسییەکان ببنەوە. هاوکات سوپاسی زۆری ئەمریکا و هاوپەیمانەکانی کرد و رێزی لە هاوکاری و پشتیوانییەکانیان گرت لە رابردوودا پێشکەشی هەرێمی کوردستان و هێزی پێشمەرگەیان کردووە.
لە کۆتاییدا وەزارەتەکە، رایگەیاند، هێزی پێشمەرگە وەک بەشێک لە سیستمی بەرگریی عێراق، پەیوەندییەکی دەستووری و ئەمنیی پتەوی لەگەڵ سوپای عێراقدا هەیە و لە کارکردنی هاوبەش و هەماهەنگی بەردەوام دەبن. دڵنیاییشی دایە خەڵکی کوردستان وڵاتەکەیان لە دەستێکی ئارام و ئاشتیخوازدایە.
گفتوگۆکانی کشانەوەی هێزەکانی ئەمریکا و هاوپەیمانیی نێودەوڵەتی لە عێراق لە ماوەی ساڵانی رابردوودا یەکێک بووە لە پرسە ئاڵۆزەکانی نێوان بەغدا و واشنتن. بەپێی رێککەوتنی نێوان هەردوو وڵات، بڕیارە تاوەکوو کۆتایی مانگی ئەیلوولی 2026، زۆربەی هێزەکانی ئەمریکا خاکی عێراق و هەرێمی کوردستان جێبهێڵن.
ئەم کشانەوەیە لە کاتێکدایە ناوچەکە بە دۆخێکی زۆر ناسەقامگیردا تێدەپەڕێت. لە مانگی شوباتی ئەمساڵەوە جەنگێکی قورس لە نێوان ئەمریکا و ئێران و گرووپە چەکدارەکانی نزیک لە تاران سەریهەڵداوە. لەو ماوەیەدا خاکی هەرێمی کوردستان چەندین جار بووەتە ئامانجی هێرشە مووشەکی و درۆنییەکانی ئێران و میلیشیاکان، تەنانەت نووسینگەی مەسرور بارزانی، سەرۆکوەزیرانی هەرێمی کوردستانیش لە ناوەڕاستی مانگی ئابدا کرایە ئامانج.
