ئاژانسی هەواڵگریی فیدراڵی، دۆسیەیەکی گەندەڵیی دارایی و کارگێڕیی لە بەڕێوەبەرایەتیی پەروەردەی دیوانییە ئاشکراکرد، کە پەیوەستە بە مامەڵە و فەرمانەکانی دامەزراندن.
ئەمڕۆ چوارشەممە، 23ـی ئەیلوولی 2026، لە راگەیەندراوێکی وەزارەتی ناوخۆی عێراق دا هاتووە، تیمەکانی ئاژانسی هەواڵگری و لێکۆڵینەوەی فیدراڵی لە وەزارەتی ناوخۆ، ئەو کەیسەیان ئاشکراکرد کە تێیدا بەرامبەر بە وەرگرتنی پارە، یاری بە مامەڵەکانی دامەزراندن کراوە.
ئاماژەی بەوەش دراوە، هەواڵگریی فیدراڵی بۆسەیەکیان بۆ تۆمەتبارەکە داناوە و لە ئەنجامدا کارمەندێکی بەڕێوەبەرایەتییەکە دەستگیرکرا، لە کاتی دەستگیرکردنیشیدا، دەستیان بەسەر ژمارەیەک مامەڵەی دامەزراندن و بڕێک پارەدا گرت کە پەیوەندییان بەو کەیسەوە هەیە.
لێکۆڵینەوە سەرەتاییەکان دەریدەخەن گومان دەکرێت ئەو کارمەندە بەرامبەر بە راییکردنی فەرمانی کارگێڕیی و مامەڵەکانی دامەزراندن پارەی وەرگرتبێت، هاوکات گومانی ئەوە هەیە کارمەندی دیکە پەیوەندییان بەو دۆسیەیەوە هەبێت.
رێکارە یاسایی و دادوەرییەکان بەرامبەر بە تۆمەتبارەکە گیراونەتەبەر، لێکۆڵینەوەکان بەردەوامن بۆ ئاشکراکردنی سەرجەم وردەکارییەکانی کەیسەکە و دیاریکردنی هەموو ئەو کەسانەی تێیدا تێوەگلاون، تا بە دادگا رادەست بکرێن.
