هەشتەمین پێشانگای نێودەوڵەتیی کەرەستەی بیناسازی، تەکنەلۆژیا و ئامێرەکانی فێنککەرەوە لە هەولێر دەکرێتەوە.
ئەمڕۆ سێشەممە، 22ـی ئەیلوولی 2026، بەگوێرەی زانیارییەکانی رێناس عەلی، پەیامنێری، زیاتر لە 350 کۆمپانیای ناوخۆیی و بیانی و 400 براندی جیهانی لەم پێشانگایەدا بەشدارن.
ئەم پێشانگایە یەکێکە لەە گەورەکانی هەرێمی کوردستان، کە ساڵانە بە مەبەستی خستنەڕووی نوێترین داهێنانەکانی بواری بیناسازی بەڕێوەدەچێت. پێشانگاکەی ئەمساڵ بە بەراورد بە ساڵانی رابردوو فراوانترە و نوێنەرانی 11 وڵات تێیدا بەشدارن.
کۆمپانیا ناوخۆییەکان لەم خولەدا پشکی بەرچاویان هەیە و نوێترین داهێنانەکانیان نمایش دەکەن. ئامانجی سەرەکیی ئەم پێشانگایە ناساندنی براندە جیهانی و ناوخۆییەکان و بەرزکردنەوەی کوالێتیی بیناسازییە لە هەرێمی کوردستان.
پێشانگاکە بۆ ماوەی چوار رۆژ بەردەوام دەبێت و رۆژانە لە کاتژمێر 10:00ـی بەیانی لە پێشانگای نێودەوڵەتیی هەولێر دەرگاکانی بەڕووی سەردانیکەراندا دەکرێنەوە. لە ساڵانی رابردوودا زیاتر لە 20 هەزار کەس سەردانی پێشانگاکەیان کردبوو، بۆ ئەمساڵیش چاوەڕوان دەکرێت ژمارەی سەردانیکەران زیاتر بێت.
حکوومەتی هەرێمی کوردستان لە رێگەی رێکخستنی ئەم جۆرە چالاکییانەوە هەوڵ دەدات دەرفەتی لێکنزیکبوونەوە و دروستکردنی لێکگەیشتنی هاوبەش لە نێوان کۆمپانیا بیانی و ناوخۆییەکاندا بڕەخسێنێت، تاوەکو کارکردن لەسەر پڕۆژەکانی بواری بیناسازی بە شێوازێکی هاوچەرختر بێت.
