ئەمڕۆ سێشەممە، 22ـی ئەیلوولی 2026، لێژنەیەکی باڵای ئەمنی بە سەرۆکایەتیی عەبدولئەمیر رەشید یارەڵا، سەرۆک ئەرکانی سوپای عێراق گەیشتە شنگال لە رۆژئاوای نەینەوا. سەرچاوەیەکی ئاگادار کە نەیویستووە ناوی ئاشکرا بکرێت راگەیاند، سەردانەکەی لێژنەکە بەمەبەستی بەدواداچوون بۆ دوایین پێشهاتە ئەمنییەکانی شارۆچکەکە بووە.
لێژنەکە زنجیرەیەک کۆبوونەوەی لەگەڵ فەرماندە و پێکهاتە سەربازییەکانی نێو شنگال دەستپێکردووە، لەوانە یەکینەکانی پاراستنی شنگال، یەکینەکانی ئافرەتان و ژمارەیەک گرووپی دیکە. ئامانج لەو کۆبوونەوانە تاوتوێکردنی میکانیزمەکانی رێکخستنەوەی دۆخی ئەمنی و رادەستکردنی چەکەکانە بە دەوڵەت.
ئەم جووڵە ئەمنییە لە وەڵامی ئەو راگەیەندراوەی 11ـی ئەیلوولی عەلی فالح زەیدی، سەرۆکوەزیران و فەرماندەی گشتیی هێزە چەکدارەکان دێت، تێیدا ئاشکرایکرد گرووپەکانی سەر بە بەرەی مەقاوەمە لە شنگال چەکەکانیان رادەستی دەوڵەت دەکەن و چیای شنگالیش دەکەوێتە ژێر کۆنترۆڵی تەواوی حکوومەتی فیدراڵی و دامەزراوە ئەمنی و کارگێڕییەکان.
سەرۆکوەزیران بڕیاریدا لێژنەیەکی باڵا بۆ ئامادەکردنی راپۆرتێکی گشتگیر دەربارەی دۆخی ئەمنی و خزمەتگوزاریی شنگال پێکبهێنرێت. لێژنەکە بەدواداچوون بۆ رێکخستنی دۆخی ئەندامانی یەکینەکانی بەرخۆدانی شنگال دەکات و ئەوانەی مەرجەکانیان تێدایە، لە دامەزراوە ئەمنی و خزمەتگوزارییە فەرمییەکاندا بەپێی چوارچێوە یاساییەکان دادەمەزرێن.
هاوکات لەگەڵ ئەو هەنگاوانە، پرسەکانی دیکەی پەیوەست بە سەقامگیریی شارۆچکەکە تاوتوێ دەکرێن. ئەم پرسە سەرەکییانە بریتین لە پرۆسەی ئاوەدانکردنەوە، قەرەبووکردنەوەی زیانلێکەوتووان، رەخساندنی زەمینەی گونجاو بۆ گەڕانەوەی ئاوارەکان، لەپاڵ کۆتاییهێنان بە فرەیی ناوەندەکانی بڕیاری ئەمنی لە شنگال.
