سەرۆککۆماری ئێران لە کۆبوونەوەیەکدا لەگەڵ سەرکردە ئایینییەکان و بازرگانانی هیندستان لە نیودەلهی رایگەیاند، دوژمنان کاتێک نەیانتوانی بە زۆرداری ئێران ناچار بە ملکەچبوون بکەن، پەنایان بۆ بڕینی ئاو، خۆراک و دەرمان و لێدان لە ژێرخانەکان بردووە تا خەڵک تەسلیم بکەن، بەڵام جەختی کردەوە کە گەلی ئێران هەرگیز تەسلیم نابێت و سەر بۆ زوڵم دانانەوێنێت.
هەینی 11ـی ئەیلوولی 2026، مەسعود پزیشکیان، سەرۆککۆماری ئێران لە کۆبوونەوەکەیدا لە پایتەختی هیندستان بە توندی رەخنەی لە هەژموونگەریی زلهێزان گرت و گوتی: "کێ ئەو مافەی داوە بە حکوومەتێک لە جیهاندا کە بە نیگای شومی خۆی سەرجەم دەوڵەتانی دیکە ناچار بە تەسلیمبوون بکات و بۆ هەموو دونیا بڕیار بدات؟ ئێمە دەمانەوێت مرۆڤەکان بە دادپەروەری لە تەنیشت یەکتر بژین و مافی یەکسانیان هەبێت، بەڵام ئەوان ئەمەیان ناوێت؛ ئێمەش هەرگیز ئەم ملکەچبوونە قبووڵ ناکەین و باجەکەشی دەدەین".
سەرۆککۆماری ئێران ئاماژەی بە پەلاماردانی کەرتی مەدەنی و ژێرخانەکان کرد و گوتی: "ئەگەر ئەوان پیاوی شەڕن، با لەگەڵ ئەو کەسانەدا بجەنگن کە دەجەنگن؛ چ کارێکیان بە نان، بژێوی و ژێرخانی ژیانی خەڵکەوە هەیە؟ ئەگەر ئەوان مرۆڤن، بۆچی رێگری لە ئاو، خۆراک و دەرمانی خەڵک دەکەن؟"
پزیشکیان روونی کردەوە کە پیلانی بەرامبەر ئەوەیە لە رێگەی بێبەشکردنی خەڵک لە توانا و کەرەستە سەرەتاییەکان و سنووردارکردنی پەیوەندییەکانەوە وڵاتەکە ناچار بە تەسلیمبوون بکەن، و گوتی: "چونکە نەیانتوانی بە زۆرداری گەلی ئێران ناچار بە تەسلیمبوون بکەن، دەیانەوێت بە نەبوونی پێداویستییەکان ئەمە بکەن، بەڵام خەڵکی ئێران هەرگیز تەسلیم نابن".
سەرۆککۆماری ئێران جەختی کردەوە، ئەم هەڵوێستەیان لەسەر بنەمای باوەڕی مرۆیی و ئایینییە، بەو پێیەی تەواوی مرۆڤەکان لەم جیهانەدا لە ماف و کەرامەتدا یەکسانن و تاران لە بەرامبەر زوڵم، ستەم و زۆرداریدا سەر دانانەوێنێت.
